మాజీ ఎమ్మెల్యే వెంకటరావుకు జీవిత ఖైదు!!

ఓ హత్య కేసుకు సంబంధించి మాజీ ఎమ్మెల్యే చెంగల వెంకటరావుకు అనకాపల్లి న్యాయస్థానం జీవిత ఖైదు విధించింది. విశాఖ జిల్లా నక్కపల్లి మండలం బంగారమ్మపేటలో 2007లో జరిగిన ఓ హత్య కేసులో మాజీ ఎమ్మెల్యే సహా 15 మందికి యావజ్జీవ కారాగార శిక్ష విధిస్తూ అనకాపల్లి సెషన్స్‌ న్యాయస్థానం సంచలన తీర్పు వెలువరించింది. ఈ కేసుతో సంబంధం ఉన్న మరో ఐదుగురు మహిళలకు రెండేళ్లపాటు జైలు శిక్ష విధించింది. ఈ కేసులో పోలీసులు మొత్తం 24 మందిని నిందితులుగా చేర్చగా, వారిలో ముగ్గురు వివిధ కారణాలతో మృతి చెందారు. 2007లో బీచ్‌ మినరల్స్‌ కంపెనీ ఏర్పాటు విషయమై బంగారమ్మపేటలో వివాదం చెలరేగింది. మత్స్యకారులు రెండు వర్గాలుగా విడిపోయారు. ఆ సమయంలో పాయకరావుపేట ఎమ్మెల్యేగా ఉన్న చెంగల వెంకటరావు కంపెనీని వ్యతిరేకిస్తున్న వారితో సమావేశం నిర్వహించారు. ఈ సమావేశంలోకంపెనీ ఏర్పాటుకు అనుకూల, వ్యతిరేక వర్గాల మధ్య తలెత్తిన ఘర్షణలో పూసాల కొండ అనే వ్యక్తి మృతి చెందాడు. ఈ కేసును విచారించిన న్యాయస్థానం బుధవారం సంచలన తీర్పు వెలువరించింది. గతంలో పాయకరావుపేట నియోజకవర్గం నుంచి తెదేపా తరఫున ఎమ్మెల్యేగా పనిచేసిన చెంగల, 2014 ఎన్నికల్లో వైకాపా తరఫున పోటీచేసి ఓటమిపాలయ్యారు.