థాయ్ గుహ నుంచి ఆ నలుగురిని ఇలా బయటకు తీసుకొచ్చారు!

థాయ్‌లాండ్‌లోని థామ్ లువాంగ్ గుహలో బందీలైన 12 మంది చిన్నారులు, ఫుట్‌బాల్ కోచ్‌ను బయటకు తీసుకొచ్చేందుకు ఆదివారం సహాయక చర్యలు మొదలు పెట్టిన సంగతి తెలిసిందే. గుహ నుంచి నలుగురు చిన్నారులను బయటకు తీసుకొచ్చిన తర్వాత సహాయ చర్యలను తాత్కాలికంగా నిలిపివేశారు. దీంతో గుహలో ఇంకా 9 మంది వేచిచూస్తున్నారు.ఒక బాలుడు.. ముగ్గురు డైవర్లు: ఈ రెస్క్యూ ఆపరేషన్లో మొత్తం 13 మంది విదేశీ డైవర్లు పాల్గొన్నారు. ఒక్కో పిల్లోడికి ముగ్గురు డైవర్లు ఎస్కార్టులుగా ఉన్నారు. ముందు ఒక డైవర్ వెళ్తుంటే అతని వెంట పిల్లాడు, ఆ పిల్లాడిని అనుసరిస్తూ ఇద్దరు డైవర్లు వెళ్లారు. కొంత దూరం నడుస్తూ.. మరికొంత దూరం నీటిలో ఈదుతూ దాదాపు నాలుగు కిలోమీటర్లు ప్రయాణించారు. ఒక కిలోమీటరు విస్తరించి ఉన్న ప్రమాదకర గుహ మార్గంలో మిగతా డైవర్లు నిల్చున్నారు. ఎలాంటి విపత్కర పరిస్థితి వచ్చినా వారిని రక్షించేలా ఆక్సిజన్ సిలిండర్లు, ఫస్ట్ ఎయిడ్ బాక్సులను మార్గ మధ్యలో ఏర్పాటు చేశారు. అలా సుమారు ఆరు నుంచి ఏడు గంటల తర్వాత పిల్లలను ఒక్కొక్కరిగా బయటకు తీసుకొచ్చారు. ముందుగా బలహీనంగా ఉన్న పిల్లలను బయటకు తీసుకొచ్చి.. హుటాహుటిన ఆసుపత్రికి తరలించారు.

బ్రిటన్ డైవర్లు ఈ చిన్నారులు గుహలో ఉన్నట్లు గుర్తించగా, ఐరోపా నుంచి వచ్చిన డైవర్లు.. వారిని బయటకు తీసుకురావడానికి సహకరించారు. ఆస్ట్రేలియాకు చెందిన డాక్టర్ గుహలోకి వెళ్లి పిల్లలకు వైద్య పరీక్షలు నిర్వహించారు. ఆయన అనుమతి తర్వాతే పిల్లలను బయటకు తీసుకొచ్చే చర్యలు మొదలయ్యాయి. మరో వైపు అమెరికాకు చెందిన నిపుణులు కూడా థాయ్ యంత్రాంగంతో కలిసి పనిచేస్తున్నారు. ఇలా యావత్తు ప్రపంచం ఆ పిల్లలు సురక్షితంగా బయటకు రావాలని కోరుకుంటోంది. రెండు రోజుల్లో థాయ్‌లో భారీ వర్షాలు కురిసే అవకాశాలున్నట్లు తెలుస్తోంది. ఈలోపే సహాయ చర్యలు పూర్తి చేయాలని ప్రభుత్వం భావిస్తోంది. అంతా సక్రమంగా జరిగితే.. మిగతా 9 మంది కూడా సురక్షితంగా బయటకు వస్తారని విశ్వాసం వ్యక్తం చేస్తున్నారు. ఆదివారం నలుగురు పిల్లలు సురక్షితంగా బయటకు రావడంతో రెస్క్యూ టీమ్‌లో కూడా ఉత్సాహం నెలకొంది.
ఈ సందర్భంగా చియంగ్ రాయ్ గవర్నర్ నారోంగ్సాక్ ఒసొట్టనకర్న్ విలేకరుల సమావేశంలో మాట్లాడుతూ.. ఆదివారం చేపట్టిన సహాయ చర్యలకు విరామం ప్రకటించామని తెలిపారు. గుహ నుంచి సురక్షితంగా బయటకు వచ్చిన నలుగురు చిన్నారులను తాను కలిశానని, వారి పూర్తిగా ఆరోగ్యంగా ఉన్నారన్నారు. సహాయ చర్యలకు ఆదివారం అనుకూలించిందని తెలిపారు. సుమారు 50 మంది విదేశీ డైవర్లు, 40 మంది థాయ్ డైవర్లు ఈ రెస్క్యూ ఆపరేషన్లో పాల్గొన్నారని తెలిపారు. రెండో దశ సహాయ చర్యలు 10 నుంచి 20 గంటల వ్యవధిలో ప్రారంభమవుతాయని తెలిపారు.