తేలికగా గృహ ఋణం ఎలా పొందవచ్చు???

ఇల్లు కొనాలంటే బ్యాంకు/ఇతర ఆర్థిక సంస్థల నుంచి ఋణం తీసుకోవడం మ‌ధ్య త‌ర‌గ‌తికి తప్పనిసరిగా అయిపోయింది. అయితే ఈ ఋణాన్ని పొందడం అంత సులభమేమీ కాదు. ఋణం మంజూరు కావడంలో క్రెడిట్‌ స్కోర్‌ కీలక పాత్ర పోషిస్తుందని మీకు తెలుసా? క్రెడిట్‌ స్కోరు మెరుగ్గా ఉంటేనే బ్యాంకులు/ఆర్థిక సంస్థలు సులభంగా గృహ ఋణాన్ని ఇచ్చేందుకు ముందుకు వస్తాయి. స్కోరు బలహీనంగా ఉంటే రుణం వస్తుందన్న ఆశలు వదులుకోవాల్సిందే. ఒకవేళ ఏదైనా బ్యాంకు/ ఆర్థిక సంస్థ ఋణం ఇచ్చేందుకు ముందుకు వచ్చినా వడ్డీ రేటు మోత మోగిపోతుంది.

ప్ర‌ధాన‌మంత్రి ఆవాస్ యోజ‌న
ఈ రోజుల్లో సొంతిల్లు ప్రాథమిక అవసరం. ప్రతి ఒక్కరూ తన బడ్జెట్‌ కు అనుగుణంగా సొంతిల్లు సమకూర్చుకునేందుకు ఆసక్తి చూపుతున్నారు. ఆర్థిక బలహీన వర్గాలు (ఇడబ్ల్యుఎస్‌), మధ్య తరగతికి చెందిన కింది స్థాయి ఆదాయ వర్గాలు(ఎల్‌ఎంఐ) ప్రధాన మంత్రి ఆవాస్‌ యోజన (పిఎంఎవై) పథకం కింద అందే సబ్సిడీ వడ్డీ రేట్లతో సొంతింటి వాళ్లయ్యేందుకు ఇష్టపడుతున్నారు.
ప్రధాన మంత్రి ఆవాస్‌ యోజన ప‌థ‌కం సంబంధించిన మ‌రిన్ని వివ‌రాల కోసం ఇక్క‌డ క్లిక్ చేయండి https://pmaymis.gov.in/

క్రెడిట్‌ స్కోరు కీలకం
గృహ ఋణ మంజూరులో ఆయా వ్యక్తుల క్రెడిట్‌ స్కోరే అత్యంత కీలకం. ఇది ఒక వ్యక్తి ఆర్థిక స్థోమతను సూచిస్తుంది. తీసుకున్న ఋణ బకాయిలను చెల్లించే విధానాన్ని బట్టి బ్యాంకులు, ఆర్థిక సంస్థలు ఎప్పటికప్పుడు క్రెడిట్‌ బ్యూరోలకు సమాచారం అందజేస్తుంటాయి. ఈ సమాచారం ఆధారంగానే ఈ సంస్థలు ప్రతి ఒక్కరి క్రెడిట్‌ స్కోరు నిర్ణయిస్తుంటాయి. ఇందులో ఆయా వ్యక్తుల క్రెడిట్‌ చరిత్ర, బకాయిలు చెల్లింపు విషయంలో వారి ప్రవర్తన వంటి విషయాలు కూడా ఉంటాయి. ఈ క్రెడిట్‌ స్కోరు ఆధారంగానే బ్యాంకులు, ఆర్థిక సంస్థలు గృహ ఋణం మంజూరుపై నిర్ణయాలు తీసుకుంటాయి.

వడ్డీ రేటు తక్కువ ఉండాలంటే...
క్రెడిట్‌ స్కోరు కనీసం 750 పాయింట్ల కంటే ఎక్కువ ఉండాలి. అప్పుడే బ్యాంకులు, ఆర్థిక సంస్థలు తక్కువ వడ్డీకే గృహ ఋణాలు ఇస్తాయి. ఇంతకంటే తక్కువ పాయింట్లు ఉన్న వ్యక్తులు తమ క్రెడిట్‌ స్కోరు పెంచుకునేందుకు ప్రయత్నించాలి.

క్రెడిట్‌ స్కోరును నిర్ణయించే అంశాలు
సమయానికి చెల్లింపులు బ్యాంకులు, ఆర్థిక సంస్థల్లో ఎన్ని ఋణాలున్నా వాటి బకాయుయిలను ఎప్పటికప్పుడు సకాలంలో చెల్లించాలి. ఇందులో ఏ మాత్రం ఆలస్యం జరిగినా క్రెడిట్‌ స్కోరు జారిపోతుంది. మీ బ్యాంకు ఖాతా నుంచి ఆటోమెటిక్‌ డ్యూ డిడక్షన్‌ ఆప్షన్‌ ద్వారా ఈ చెల్లింపులు చేయడం మంచిది. ఇలా చేయడం వల్ల మనం మర్చిపోయినా, ఆటోమెటిగ్గా మన ఖాతా నుంచి చెల్లించాల్సిన బకాయిల చెల్లింపు జరిగిపోతుంది. ఇందుకోసం బ్యాంకు ఖాతాలో తగినంత బ్యాలెన్స్‌ ఉండేలా చూసుకోవాలి.

తగిన స్థాయిలో రుణాలు
అప్పులు తాహతుకు తగిన స్థాయిలో ఉండాలి. అన్ని ఠంచనుగా చెల్లించాల్సిన సెక్యూర్డ్‌ ఋణాలే అయితే సమస్యలు ఎదురుకావచ్చు. ఇలాంటి ఋణ బకాయిల చెల్లింపుల్లో ఆలస్యమైనా క్రెడిట్‌ స్కోరుపై ప్రభావం పడుతుంది. చెల్లించే సామర్థ్యాన్ని బట్టి రుణం తీసుకోవాలి.

చెల్లింపులు
ఋణ బకాయిలు సకాలంలో చెల్లించడంతోపాటు మీరు హామీ ఇచ్చిన రుణ బకాయిలు సకాలంలో చెల్లించాలి. లేకపోతే మీ క్రెడిట్‌ స్కోరు దెబ్బతింటుంది. ఒక రుణానికి కో అప్లికెంట్‌గా ఉన్నా ఇదే పరిస్థితి. ఈ విషయాన్ని దృష్టిలో ఉంచుకుని ఇతరుల ఋణాలకు హామీగా ఉండేటప్పుడు లేదా మరొకరితో కలిసి కో అప్లికెంట్‌గా ఉండేటప్పుడు ఆలోచించుకోవాలి. అవతలి వ్యక్తి ఋణ బకాయిల చెల్లింపుల్లో ఏ మాత్రం ఆలస్యం చేసినా మీ క్రెడిట్‌ స్కోరు దెబ్బతింటుంది.